Ә.Ниязымбетов: 7 мамыр – еліміздің қорғаныс қабілетінің кемелденгенін айғақтайтын мереке

Kazsport agent May 3, 2013
244
0
0
0

    7 мамыр – Отан қорғаушы күні еліміздің қорғаныс қабілетінің кемелденгенін айғақтайтын мереке. BNews.kz тілшісіне берген сұхбатында еліміздің белгілі боксшысы, Лондон Олимпиадасының күміс...

   

7 мамыр – Отан қорғаушы күні еліміздің қорғаныс қабілетінің кемелденгенін айғақтайтын мереке. BNews.kz тілшісіне берген сұхбатында еліміздің белгілі боксшысы, Лондон Олимпиадасының күміс жүлдегері Әділбек Ниязымбетов осындай пікір білдірді.

«Бұл күн – қайсар мінезді ата-бабамыздың жауынгерлік дәстүрінің заңды жалғасын тапқан күні. 7 мамыр – Отанына адал, елін, жерін қорғауға әрқашан әзір ер азаматтардың мерекесі. Бұл күн — батырлық пен ерліктің, қайсарлық пен өрліктің, шыдамдылық пен төзімділіктің мерекесі деп есептеймін», — деді боксшы.

Олимпиаданың күміс жүлдегері бұл мерекенің мемлекеттік мәртебе алып, кең ауқымда атап өтілуінің маңызы зор дейді.

«Бұл күннің жастарымыздың бойында патриоттық сезімді тәрбиелеуде маңызы үлкен. Қазіргі күні жастарымыздың бойында отансүйгіштік рух бар деп ойлаймын. Ағаларымыздың тарапынан көрсетіліп жатқан қолдау да зор. Жастарымыз елінің мерейін асырып, мәртебесін көтеру үшін еңбек етіп, тырысып-ақ жүр», — деген пікірін білдірген Әділбек Қазақстан халқын мерекемен құттықтап, ізгі ниетін білдірді.

«Ең бастысы, еліміз тыныш, аспанымыз ашық болсын. Отанға адал, елге қайырымды, отбасына мейірімді ер азаматтарымыз көп болсын. Жігерлі жастарымыз еліміздің көк туын асқақ желбіретіп, елін, жерін қорғап жүрсе, Қазақстанның болашағы зор болады деген ойдамын», — деді ол.

Боксшы болашақтағы өз жоспарларымен де бөлісті. Қазіргі уақытта ол биыл Алматыда өтетін әлем чемпионатына қызу дайындық үстінде екен.

«Осы жылы Алматы қаласында алғаш рет әлем чемпионаты өтеді. Қазір осы додаға дайындалып жатырмын. Алла жазса, Әлем чемпионатында ұтқасын, 2016 жылы Риода өтетін жазғы Олимпиада ойындарына дайындыққа кірісемін. Денсаулық болса, алда бәрі болады деп ойлаймын», — деді Лондон Олимпиадасының күміс жүлдегері.

 

Оцените пост

0