Сайда Хасенова: Кети Тейлор болмағанда, Олимпиадаға бармайтын да едім...

Kazsport agent 2013 M03 18
269
0
0
0

  Менің болашаққа бағыттаған жоспарларым мол. Міне, жаңа олимпиадалық цикл басталды. Қайтсем де, жіберген қателігімді түзетуім керек. Әлі екі олимпиада ойындарына қатысуға мүмкіндік бар...

 

Менің болашаққа бағыттаған жоспарларым мол. Міне, жаңа олимпиадалық цикл басталды. Қайтсем де, жіберген қателігімді түзетуім керек. Әлі екі олимпиада ойындарына қатысуға мүмкіндік бар. Олимпиададан жүлде алмай тыншымайтыным анық. Бәлкім, босаңсып кетпеуім үшін де маңдайыма жеңілу жазылған шығар.

Қазақтың боксшы қыздары арасында қазір Сайда Хасенованың тасы өрге домалап тұр. Олимпиада ойындарының қызығы мен шыжығына куә болған тұңғыш аруымыз. Аз уақыттың ішінде-ақ өз жұдырығының қауқарын әлемге танытып үлгерді. Азия біріншілігінің жеңімпазы, сары құрлық ойындарының қола жүлдесі де қанжығасында. Таяуда Қазақстан чемпионатында алтыннан алқа таққан шаршы алаңның шынарымен жүздесіп, көкейіндегі ой-жоспарларын білген едік.

– Сайда, әңгімемізді боксқа қалай келгенің жөнінде бастасақ. Білуімізше, отбасың спортқа жақын жандар сияқты…
– Расында, спортқа ойысуыма себепші болған ата-анам. Олар да спорттың төңірегіндегі жандар. Әкем аяқдоп өнеріне әуестенсе, анам – шаңғышы. Жастайымнан осы бір сиқырлы өнерді құлағыма сіңіріп өстім. Әуелде қызықтап каратэге үйірсектесем керек. Кейіннен ұстазым бокспен шұғылдануға кеңес беріп қана қойған жоқ, жетектеп әкеліп Кәрім Махмудовқа тапсырды. Міне, 2004 жылдан бері осы кісінің тәрбиесіндемін.
– Өткен жылы бағың жанып, Олимпиада додасына қатыстың. Дегенмен, Лондонға «билет» алуыңның өзі оңай болмаған секілді.
– Лицензиялық әлем біріншілігінде орта жолда сүрінгеннен кейін түрлі ойдың құшағына ендім. Өйткені жолдамаға ширек финалға өткендер ғана иелік етуге тиіс еді. Бірақ соңына дейін үмітімді үзбедім. Жарыс біткеннен кейін жолдама мәселесі қайта қаралып, үміт отын тұтатқандай болды. Бұл ретте ирландиялық Кэти Тейлорға рахмет айтуым керек шығар. АИБА баксшылығы осындай қарымды қарсыластан ұтылғанымды ескеріп, Лондонға жіберуді ұйғарыпты.
– Олимпиадаға зор қошеметпен аттандырған халқың сенен жүлде күткен. Алғашқы айқасыңда-ақ қарсыласыңа есе жібереді деп ешкім ойлаған жоқ еді. Қателік қай жерден кетті деп ойлайсың?
– Спортта бәрі өзің ойлағандай бола бермейді, әрине. Шынымды айтсам, мен қауіптенген спортшы Кэти Тейлор еді. Бразилиялық Адриана Араужоға есе жіберемін деген ой мүлдем болған емес. Оған дейінгі кездесулерде жеңіс менің пайдама шешіліп жүрген. Лондон төрінде де өз күшіме сендім. Тіпті, алғашқы кезеңдерде ұпай санымен жеңіп жатқанмын. Соңына қарай күтпеген жерден ескерту беріліп, екі ұпай жоғалттым. Қазір ойласам, тағдырымды төрешілер шешкен секілді. Ең бастысы, жүлдеге бір қадам қалғанда сүрінуің өзекті өртейді екен.
– Ирландиялық қыздың спортта бағындырмаған белесі жоқ: 4 дүркін әлем, 5 мәрте Еуропа чемпионы. Олимпиада жеңімпазы да атанды. Осы қыздың бойында қандай артықшылық бар деп ойлайсың?
– Мойындау керек, шетелде қыздар боксына деген көзқарас өзгеше. АҚШ, Ұлыбритания және Ресейде қыздар боксына назар ерекше. Онда бір спортшының жанында бірнеше адам еріп жүреді. Бірі массажист, бірі диетолог, бірі дәрігер дегендей, екі жаттықтырушысы тағы бар. Мұндай жағдайдан кейін жүлде алмаудың өзі ұят. Тейлор – дарынды спортшы. Өте ширақ қимылдайды. Қарсыласының бір соққысына 2-3 соққымен жауап қайтаратындай қабілеті бар. Жеке бапкері – өзінің әкесі. Осы Олимпиаданың қорытындысынан-ақ қай елдің шоқтығы биік екенін аңғару қиын емес. Соңғы жылдары Қытай мен Бразилия да нәзікжандар боксын өркендетуге бет алды. Ал біздегі қыздар боксы тәй-тәй басқан бала секілді. Соның өзінде Марина Вольнова Лондоннан құр қол қайтқан жоқ. Оның үстіне, қыздардың боксы біздің ділімізге сай емес деушілер де бар.
Соңғы кездері жарқ етіп көзге түскен боксшы қыздардың бірі тәжікстандық Мавзуна Шориева. Тек Азия чемпионы ғана емес, Олимпиада һәм әлем біріншілігінің жүлдегері атанып үлгерді. Онымен бұрын жолың түйісіп пе еді?
– Онымен екі рет жұдырықтасып, екеуінде де аптығын басқанмын. Естеріңізде болса, Азия ойындарының алғашқы кезеңдерінде жолын қиған едім. Тәжік қызының кейде бағы жанып кететіні бар. Аталған екі додада да жеребе оң жамбасына дәл келді.


– Өзің айтқандай, біздің дәстүрімізде қыз баланы ертерек құтты орнына береді. Осы жағын ойлап жүрсің бе?


– Барлық қыздың ертерек тұрмысқа шығу ниеті бар ғой. Ал мен үшін әзірге бірінші кезекте спорт тұр. Алдыма қойған мақсат-мүдделерім бар. Қалғанын уақыт көрсетер.


– Болашақ ой-жоспарларыңды білгіміз келеді.

– Спортта мақсатсыз жеңіске жетемін деу бос әурешілік. Менің болашаққа бағыттаған жоспарларым мол. Міне, жаңа олимпиадалық цикл басталды. Қайтсем де, жіберген қателігімді түзетуім керек. Әлі екі олимпиада ойындарына қатысуға мүмкіндік бар. Олимпиададан жүлде алмай тыншымайтыным анық. Бәлкім, босаңсып кетпеуім үшін де маңдайыма жеңілу жазылған шығар. Бапкеріммен ақылдаса келе, бұрынғы өзімнің салмағыма қайта оралдым. Келешекте осы 64 келі салмақ Олимпиада бағдарламасына енеді деген сөз бар.


– Кімді үлгі тұтасың?

– Қазақ қыздарының қабілет-қарымы ешкімнен кем емес. Маған өзімнің құрбым, Азия чемпионы Дариға Шәкімованың жұдырықтасу мәнері ұнайды. Жеңіл салмақтағы Жайна Шекербекованың да техникасы тартымды. Ал әлем боксында Кэти Тейлордың орны бөлек.

 

Оцените пост

0