Құқығыңды қорғай біл – қызметі үшін ақы алмайтын «Әділетті» пайдалан!

ИПС «Әділет» 2012 M12 17
1399
0
2
0

Қазіргі заң заманында еліміздің әр азаматы өз құқықтарын білуге міндетті. Кез- келген Заң ел мүддесі үшін жасалады. ҚР Әділет министрлігінің ұйытқысымен «Әділет» ақпараттық-құқықтық жүйесі іске...

Қазіргі заң заманында еліміздің әр азаматы өз құқықтарын білуге міндетті. Кез- келген Заң ел мүддесі үшін жасалады. ҚР Әділет министрлігінің ұйытқысымен «Әділет» ақпараттық-құқықтық жүйесі іске қосылды. Аталмыш жүйенің ел тұрғындары үшін  пайдасы мен артықшылықтары  туралы  Қазақстан Республикасы Әділет министрлігінің «Республикалық құқықтық ақпарат орталығы»  республикалық мемлекеттік кәсіпорны директорының орынбасары Раушан Нұрымбекқызы Жантасова айтып берді.

- Раушан Нұрымбекқызы, сайтты құру идеясы  қалай туындады? Басты мақсаттарыңыз не?

- Қазақстанның құқықтық ақпараттандыру тарихы 19 жылды құрайды. Бұл даму, іздену, қалыптасу арқылы өткен жол. Сенуге мүмкін емес, бірақ осыдан жиырма жыл бұрын іздестіру құқықтық жүйелері қиял болып саналатын, заңнама жинағы қағаз түрінде жүргізілді, нақты нормативтік құқықтық актіні іздеуге уақыт қажет болды, ал заңнаманы түзейтін актілерді қолдану көп еңбекті қажет етті және ыңғайсыз болды. Алғашқы пайда болған құқықтық іздестіру жүйелері қазіргі пайдаланушының тұрғысынан қарапайым болды, ақылы негізде ұсынылды, ал олардың бірінші тұтынушылары – негізінен заңгерлер болған. Ақпараттық-құқықтық қызмет көрсету нарығының кеңеюімен біртіндеп бағдарламалар жетілдірілді, олардың құны төмендеді, ал халықтың компьютерлік және құқықтық сауаттылығының өсуімен оның пайдаланушыларының контингенті де кеңейді.               ҚР Президентінің 2010 жылғы 1 ақпандағы                № 922 Жарлығымен бекітілген Қазақстан Республикасының 2020 жылға дейінгі Стратегиялық даму жоспарын іске асыру үшін Республикалық құқықтық ақпарат орталығы ҚР Әділет министрлігімен бірлесіп бірегей жоба – нормативтік құқықтық актілердің мәтіндерімен онлайн режимінде жұмыс істеуге мүмкіндік беретін «Әділет» ақпараттық-құқықтық жүйесін әзірледі.  «Әділет» ақпараттық-құқықтық жүйесі – қалың бұқара топтарына өтеусіз негізде ақпараттық қызмет көрсетуді ұсынудан тұратын айқын әлеуметтік жоба. Осы ақпараттық қызметтердің тегін болуы пайдаланушылардың барлық санатына баға жетпес көмек береді деп есептеймін.  Оны іске қоса отырып, біз Қазақстан тұрғындарының құқықтық және компьютерлік  сауаттылығын арттырамыз, халықтың түрлі санаттары арасындағы ақпараттық теңсіздікті төмендетеміз, ақпараттық ресурстарына жеке және заңды тұлғалардың тең қол жетімділігіне жағдай жасаймыз, халықтың құқықтық сауаттылығы деңгейін арттырамыз,  мемлекеттік органдар қызметкерлерінің, кіші, орта және ірі кәсіпкерлік субъектілерінің біліктілігі мен кәсіпқойлығын арттырамыз және  түрлі бұқара топтарының мүдделерін білдіретін жұртшылық, үкіметтік емес ұйымдар мен қоғамдық бірлестіктер өкілдерінің  шығармашылық қызметке белсенді қатысуын қамтамасыз етеміз.

- Сайт қашан іске қосылды?

-  «Әділет» ақпараттық-құқықтық жүйесі 2012 жылдың 1 қаңтарынан бастап ілкі жоба ретінде  Қазақстан Республикасы  Әділет министрлігінің сайтында іске қосылды.

- Бүгінгі күнге дейін канша адам сайт пайдаланушысы атанды?

- «Әділет» ақпараттық-құқықтық жүйесі 2012 жылдың басында іске қосылған уақытта 6 мың ғана пайдаланушысы болса, бүгінгі таңда осы жүйеге жүгінетін пайдаланушылардың саны айына 500 мыңға жетіп отыр. Осыдан шығатын қорытынды - бұл жоба бүгінгі таңда шын мәнінде үлкен сұранысқа ие болып отыр. Менің ойымша, пайдаланушылардың  саны уақыт өткен сайын тек артатын болады.

- Сайттың  артықшылықтарына тоқталсаңыз?

- «Әділет» ақпараттық-құқықтық жүйесінің артықшылықтары көп. Мысалы,  алуан түрлі іздестірулер пайдаланушының өздігінен тақырыптық іріктелім қалыптастыруына мүмкіндік береді,  компьютерлік сауаттылығы әр түрлі деңгейдегі пайдаланушылар үшін онда жұмыс істеудің қолайлылығын қамтамасыз ететін ыңғайлы заманауи интерфейсі бар, жүйе тәулік бойы жұмыс істейді,  күн сайын жаңартылады, екі тілде қарау мүмкіндігі бар. Ең маңыздысы бұл жүйе - тегін.

 

- Онда студент болсын, үй шаруасындағы әйел болсын өзіне қажет болып қалатын қандай  мәліметтер ала алады?

- Үйде, жұмыста, кітапханада отырып, ғаламтор арқылы қажетті сілтемені  www.adilet.zan.kz басу жолымен,  өзіне қажетті нормативтік құқықтық актіні іздеу, содан қажетті мәліметті басып шығару, оны өз компьютерінде немесе кез- келген ақпарат тасығышта сақтау мүмкіндігі бар. Мысал үшін, жеке кәсіпкер салық төлеуге байланысты сұрақ туындаған жағдайда, «Салық кодексін» не болмаса салық саласына байланысты  құжатты ашып, қажетті үзіндіні басып шығара алады.  Жүктілікке байланысты демалыста отырған болашақ ана үйден шықпастан әлеуметтік жәрдемақыларға қатысты әр түрлі мәліметті, «Еңбек кодексінен» қажетті ақпаратты осы жүйе арқылы біле алады.  Егер де пайдаланушы нақты қандай құжат қажет екендігін білмесе, ол сол салаға не актіні қабылдаған органға байланысты  немесе актінің түріне (Жарлық, Кодекс, Заң, Қаулы, Бұйрық, шешім) байланысты іздеу жүргізе алады.

- www.adilet.zan.kz сайтына  қаншалықты жүгінуге болады?

-«Әділет» ақпараттық-құқықтық жүйесі –  нормативтік құқықтық актілердің жүйелендірілген әрі түпкілікті деректер қоры болып табылады, ол тек қана ресми дереккөздерден жинақталады. Күн сайын жаңартылады. Сонымен қатар, кез- келген нормативтік құқықтық актіге енгізілген өзгерістер мен толықтырулардың хронологиясын қарау мүмкіндігі бар.

- Раушан Нұрымбекқызы, «Әділет» жобасы өте игі бастама екені анық. Осы жобадан күтетін нәтижелеріңіз қандай?

- Осы әлеуметтік маңызды жүйені іске қоса отырып, біз халықтың түрлі санаттары арасындағы ақпараттық теңсіздікті  төмендетеміз, халықтың құқықтық мәдениетін арттырамыз, өзінің конституциялық құқықтары мен еркіндіктерін жүзеге асырудағы халықтың әлеуметтік қанағаттанбаушылығының байқалуы фактілерінің санын едәуір төмендететінімізге  сенімдіміз.

- Алда  қазақстандықтарды үлкен мейрам ҚР Тәуелсіздік күні мерекесі күтіп тұр, Раушан Нұрымбекқызы, мүмкіндікті пайдаланып күллі алаш жұртын құттықтауыңызға болады..

- Барлық қазақстандықтарды ұлттық мереке – Қазақстан Тәуелсіздігінің 21 жылдығымен шын жүректен құттықтаймын! Еліміз тәуелсіздік алған күннен бастап біраз жетістіктерге қол жеткіздік. Конституция мен заң үстемдік ететін құқықтық мемлекеттің қалыптасуына біздің кәсіпорынның да қосып жатқан, әлі де қосар үлесі ауқымды. Барлық күш-жігерімізді  Отанымыз Қазақстанның одан әрі гүлденуіне, халқының әл-ауқатының артуына бағыттаймыз! Әр отбасына татулық пен ырыс-береке, Отанымыздың игілігі мен жарқын болашағы жолында жаңа табыстар тілеймін.

- Мазмұнды сұхбатыңыз үшін алғыс айтамыз.

Оцените пост

1
Дальше