Инвестициялық форум өтті

miss-Lee 2012 M09 26
672
0
1
0

Бүгін Ақтауда «Батыс Қазақстанда жаңа өндірістер құру» деген тақырыппен өткен инвестициялық форум аяқталды. Мұндай ірі шараның Ақтауда өтуінің де өзіндік мәні бар. - Батыс Қазақстан –...

Бүгін Ақтауда «Батыс Қазақстанда жаңа өндірістер құру» деген тақырыппен өткен инвестициялық форум аяқталды. Мұндай ірі шараның Ақтауда өтуінің де өзіндік мәні бар.

- Батыс Қазақстан – экономикалық әлеуеті аса зор, жаңа және қызықты нарық. Экономикалық әріптес болғысы келетін компаниялар үшін мүмкіндіктер бар, – дейді «ҚазМұнайГаз» ҰК АҚ басқарма төрағасының жергілікті мазмұнды дамыту жөніндегі кеңесшісі лорд Уэверли.

Үш күнге созылған форумға ұзын саны 35 елден 500-ге жуық делегат қатысты. Бірқатар жобалардың тұсаукесері жасалды. Әсіресе, мұнайгаз өнеркәсібіне айрықша назар аударылды. Ауыл шаруашылығы, туризм, қалпына келтірілген энергия, су тазарту, машина жасау сияқты жобалар да назардан тыс қалмады.

- Солтүстік Каспий және басқа да оффшорлық жобаларда қазақстандық үлесті көбейтуге тиіспіз. Қазіргі таңда мұнай-газ компаниялары сатып алып отырған тауарлардың 10 пайызы ғана еліміздің үлесінде болып тұр, – дейді облыс басшысы Б.Мұхаммеджанов.

Мұнай-газ компанияларының сатып алуларындағы жергілікті мазмұн мәселесінің өзектілігін «KAZENERGY» қауымдастығының бас директоры Жанболат Сәрсенов те атап өтті.

–     Бұл – кешенді мәселе. Қолданыстағы қазақстандық мазмұнды анықтау әдістемесіне де қатысты, сатып алу процесін сәйкестендіру жағдайларына да қатысты. Сондықтан әріптестік әдіске көшетін кез жетті, – дейді Ж.Сәрсенов.

Форумда республиканың батыс аймағындағы үш облыс – Маңғыстау, Атырау, Орал өңірлерінің басшылары да өз өлкелерінің мүмкіндіктерімен таныстырды.

Мәселен, Атырау облысы әкімінің орынбасары Асқар Әбдіров бұл өңірдің алыс және жақын шетелдегі 52 мемлекетпен байланыс жасайтынына ерекше назар аударды. Бұл өлкені әлем көмірсутек шикізатының көзі ретінде таниды. «Мұнайгаз өндірісімен қатар түрлі минералдар мен құрылыс материалдарының кенорыны бар. Облыста шетелдік инвестиция тарту үшін бар жағдай жасалған», – дейді А.Әбдіров.

Маңғыстау өлкесінде іске асырылатын жобалар туралы облыс әкімінің орынбасары Біржан Канешов баяндады.

–     Аймақтың инновациялық-технологиялық деңгейін және жалпы экономикалық дамудың деңгейін көтеру мақсатында «Маңғыстау ақылды аймақ» атты инновациялық даму концепциясы жасалуда. Ол өзінің негізін халықаралық бағдарламалардан алады, бірақ Маңғыстау өңірінің ерекшелігіне бейімделген. Бағдарлама маңызды алты саланы қамтиды: өнеркәсіп, энергетика, экология, ауылшаруашылығы, туризм мен сумен жабдықтау, – дейді Б.Бисекенұлы.

- Егер жұмыс болмаса, тіршілік те жоқ. Жаңа өндірістер құру қажет. Бұл - барлық батыс аймағының мәселесі, – деген еді «ҚазМұнайГаз» ҰК АҚ басқарма төрағасы Л.Қиынов форум барысында.

Жаңа өндіріс орындарын құруды өзіне міндет етіп алған форум соңында меморандумдар мен келісімшарттарға қол қойылды. Оның ішінде мынадай құжаттар бар:

1.  Жаңаөзен қаласында өндіріс орындары шоғырланатын индустриалық парк ашу бойынша ҚМГ және «Castle Oil&Gas Fields Services LLC» (Италия) компаниялары арасындағы өзара түсіністік туралы меморандумға;

2.  Күн энергетикасын дамыту мақсатында фотоэлектрлік модуль өндіру бойынша Маңғыстау облысы әкімдігі мен «Актив Солар» ГмбХ (Австрия) компаниясы арасындағы өзара түсіністік туралы меморандумға;

3.  Маңғыстау облысы әкімдігі мен «Алтын КДТ» ЖШС компаниясы арасындағы өзара түсіністік туралы меморандумға;

4.  Механикалық өндіру жұмыстарына қажетті жоғары технологиялық мұнайгаз жабдықтарын жасайтын өндіріс ашу жөнінде ҚМГ және Қытай Ұлттық Мұнайгаз Корпорациясы (ҚХР) арасындағы өзара түсіністік туралы меморандумға;

5.  ҚР мұнайгаз құрылғыларын шығаратын кәсіпорын ашу жөнінде ҚМГ мен «DKG-East» (Венгрия) компаниясы арасындағы өзара түсіністік туралы меморандумға қол қойылды. Бұл кәсіпорында түрлі құтыларды, фильтрлер мен жылуалмастырғыш жабдықтар шығарылмақ.

Сонымен қатар, ҚМГ, «СамұрықҚазынаИнвест» ЖШС, Маңғыстау облысының әкімдігі және «Vallourec&Mannesmann Tubes» (Франция, Германия) компаниялары арасында  келісімшарт жасалды.

Сондай-ақ, ҚМГ, Теңізшевройл, НКОК және КПО компаниялары арасында «Бірлескен іс-қимыл туралы Ақтау дикларациясы» қабылданды.

Оцените пост

1