Yvision.kzYvision.kz
kk
Разное
Разное
399 773 постов41 подписчиков
Всяко-разно
0
08:43, 29 мая 2012

Қазақстан – Туымен тұғырлы, Елтаңбасымен еңселі, Әнұранымен айбатты

Дәл осындай тақырыпта мамыр айының 25 күні қазақ қыздарының қара шаңырағы саналатын белгілі оқу орны – Қазақ мемлекеттік қыздар педагогикалық университетінде, осы оқу орнының «Парасатты НЛО (Нағыз Лидерлер Одағы)» пікір-сайыс клубының ұйымдастыруымен дөңгелек үстел өтті. Бұл дөңгелек үстел аты айтып тұрғандай биылғы жылы мемлекеттік рәміздерімізге 20 жыл толу мерейтойына қарсы ұйымдастырылды. Бұл бас қосуға «Парасатты НЛО» пікір-сайыс клубының мүшелері белсене қатысты. Дөңгелек үстелдің өту барысын клубтың жаңа сайланған үйлестірушісі – Абишива Райхан жүргізді. Бағдарлама бойынша рәміздерге қатысты баяндамалар оқылды. «Мемлекеттік рәміздерді құрметтей алып жүрміз бе?» деген тақырыпта сөз еткен клуб мүшесі, Ходжаева Ұлжан, жиналған қауымды біраз ақпаратпен қамтып өтті. Яғни, қазіргі таңда мемлекеттік рәміздеріміздің жоғары деңгейде ұлықталмай жатқандығына, тіпті, ұлықталмақ түгілі, дәрежесі түсіп кеткеніне мысалдарымен тоқталып өтті. Айталық, Мемлекеттік Тумен қоқыс тасығандарды бейнесюжет арқылы таныстырған ол, туымыз бейнеленген жалаушалардың мәнісі кетіп, қоқыс жәшіктерінен табылып жататындығын, сондай-ақ елтаңбамызды кейбір адамдар асыра ұлықтап, үйінің балконына іліп қоятын жайттарды қалың көпшілікке фотосуреттер арқылы көрсетіп өтті. Одан бөлек ту дегеннің өзі тарихта, ата-бабамыздың талай ғасырлық шежіресінде айрықша орын алған дүние екендігін айта отырып, жастарға біршама ой салғандай болды.Осыдан кейін «Халық рухының үні – Әнұран» деп аталған баяндамамен клуб мүшесі, Өмірқұлова Айжан ары қарай жалғастырды. Мемлекеттік әнұранның осыған дейінгі тарихымен таныстырып өткен ол, оның авторлары туралы да сөз етті. Қазргі күні 20 жылдығын тойлағалы отырған рәміздеріміздің , соның ішінде осы әнұранның қорланып, шет елде, оның ішінде кешегі Кувейт елінде болған жағдайды қадап айтты. Сондай-ақ өзімізде өткен басқа да спорттық бәсекелерде байрағымыздың жерде қалып жататын сәттерінің аз еместігімен таныстырды. Осы баяндамалардан кейін дөңгелек үстелге жиналғандаромен пікір алмасу болды. Бас қосуды жүргізуші – Райхан: «Біз, жастар осы мемлекеттік рәміздердің ұлықталуына қандай үлес қосып жүрміз?» деген  ортаға сауал тастады. Алдымен осы бас қосуға қатысушы, университеттің жастар саясаты бөлімінің меңгерушісі Елнұр Қайратқызы сөз алып, рәміздерді ұлықтауды өзімізден бастағанымыз дұрыс, жаңағыдай келеңсіздіктер университет тарапынан да орын алып жатса, оған бей-жай қарамай өзіміз бас болып, тиісті іс-шара көрсетуіміз керек екенін ескертті. Ары қарай «Парасатты НЛО» пікір-сайыс клубының басқа да белсенді мүшелері, Әлімбекова Н., Бөпиева А., Үргенішбаева А., т.б. студенттер өздерінің ой-пікірлерін айтып, ұсыныстарымен де бөлісті. Қаншама пікір алмасулардан кейін, дөңгелек үстелге қатысқан барлық студент, жастардың бойларына патиоттықтың кішкене де болса бекінісі қаланып, ойларына мемлекеттік рәміздеріміз туралы өшпейтін ой қалғандай болды. Соңында, бүгінгі дөңгелек үстелде қаралған мәселені зерделей келе, мемлекеттік рәміздерді ұлықтауға біз қалай үлес қоса аламыз деген сауалға жауап ретінде жастарға үндеу жарияланды. Қыздар университетінің «Парасатты НЛО» пікір-сайыс клубы осы үндеуді жариялай отырып, университеттің басқа да белсенді ұйымдарын және Қазақстанның басқа да жоғарғы оқу орындарының жастарын бірлесіп жұмыс істеуге шақырды. Еліміз үшін елеулі істерден бәріміз шет қалмайық! Төменде үндеудің мәтіні берілген.

Қазақ мемлекеттік қыздар педагогикалық университетінің «Парасатты НЛО» пікірсайыс клубының жастарға ҮНДЕУІ

Біз, Қазақ мемлекеттік қыздар педагогикалық университетінің «Парасатты НЛО» пікір-сайыс клубының белсенді жастары, Тәуелсіз қазақ елінің болашағына бей-жай қарамайтын, болашаққа бүгіннен бастап терең көзқараспен қарайтын, кешегі өткен асқақ рухты бабаларымыздың бүгінгі тұяқтары, Алаштың аманатын арқалаған асқақ рухты, жалындай жігерлі жастарға ҮНДЕУ жолдаймыз!

Құрметті замандастар! Биыл мемлекеттік рәміздердің қабылданғанына 20 жыл толып отыр. Мемлекеттік рәміздер, бұл елдігімізді айқындап, еркіндігімізді білдіретін мемлекеттік басты белгілері.

Ұлттық рәміздердің қорлануы – ұлттық намыстың қорлануы! Бүгінгі күні еліміздің айшықты белгілері жоғары деңгейде ұлықталып жүр ме? Әрине, жоқ.

Мемлекет тарапынан міндет дұрыс атқарылып жатса да, «Мемлекеттік рәміздер туралы Заңда» көрсетілген әрбірімізге қатысты міндетке әлі де болса, жауапсыздықпен қарап келеміз. Бұл мәселені шешу үшін, төмендегі міндеттемелерлді бірлесе істеуге шақырамыз:

-жастардың ұялы байланыс не басқа да ақпараттық құралдарында Мемлекеттік Әнұранды ретсіз пайдалануға жол бермеуге;

-салтанатты шерулерде, жиындарда және т.б. мерекелік кештерде Мемлекеттік рәміздер бейнеленген бас киім не жалаушалардың пйдаланылғаннан кейін, ескерусіз, яки, аяқ асты қалмауын қадағалауға, егер ондай жағдай орын алса, заңмен жазаланатынын ескертуге;

-әрбір студент өзі оқитын ЖОО-дағы Мемлекеттік рәміздердің өзіндік талаптарға (тазалық, т.б.) сай келмеген жағдайда, оған салғырт қарамау;

-әрбір ЖОО студенттері Мемлекеттік рәміздер күнінде белсенділік танытып, оны құрметтеуге және жоғары деңгейде ұлықталуына үлес қосуға шақырамыз!

25. 05. 2012 ж.

Үргенішбаева Айнұр

«Парасатты НЛО» пікір-сайыс клубының мүшесі,

География мамандығының 3-курс студенті

 
0
1742
1