Өкінішке қарай, осы күні жасөспірімдерге қатысты жаға ұстатар жайттар көп. Соның бірі – бесіктен белі шықпаған өрімдей қыздардың ойнап жүріп, от басып, оң жақта отырып, бала көтеруі. Жыл сайын мектеп жасындағы мыңнан астам қазақстандық қыз жүкті болып, өмірге некесіз әрі әкесіз бала әкелсе, сандаған бейкүнә шарана жарық дүниеге келмей жатып-ақ жапа шегуде. Мұндай жағдайлар біздің өңірде де жоқ емес. Облыстық денсаулық сақтау басқармасының мәліметіне сүйенсек, аймақ бойынша 2011 жылы 15-18 жас шамасындағы 154 қыз жасанды түсік жасатса (2010 жылы - 180 қыз), 132 жасөспірім «ана» атанған (2010 жылы – 155 қыз). Өкініштісі, облыста жасы 15-ке толмай жатып жасанды түсік жасатқан балғын жеткіншектер де бар көрінеді. Мәселен, алдыңғы жылы – 3, ал былтыр – 1 мектеп оқушысы жатырындағы жазықсыз сәбиден құтылу үшін жасанды түсік жасатуға мәжбүр болыпты.