Испания. Ұшу кезеңі.

2774
9
0
5

Қазірде әлемнің кез келген түкпіріне өз бетінше саяхат жасау авантюристер ортасында ғана емес, көпшілік арасында да кең таралған үрдіске айналды. Сауатты құрылған саяхат туристік агенттігінің дәстүрлі

Қазірде әлемнің кез келген түкпіріне өз бетінше саяхат жасау авантюристер ортасында ғана емес, көпшілік арасында да кең таралған үрдіске айналды. Сауатты құрылған саяхат туристік агенттігінің дәстүрлі маршрутынан гөрі молырақ әсер алуға және де кей жағдайда қаржының да аз шығындалуына мүмкіндік береді. Сонымен өз бетіңше саяхаттауды қалай және неден бастау керек?


Алдымен, барар жеріңізді белгілейсіз. Мүмкін ол бала кездегі арманыңыз, не қазірде танымал болған курорттар, не тарихи маңызы бар жерлер. Біздің қолданатын басты құралымыз, әрине, интернет болмақ. Интернеттен баратын еліңіз жайлы максимальды түрде мағлұмат алып алуға тырысыңыз. Ол елдің ерекшелігін, міндетті түрде бару керек жерлерін белгілеп, саяхатыңыздың маршрутын асықпай жоспарлап алыңыз.

Біздің мысалымызда бұл ел – Испания. Жалпы Испанияға жылдың кез келген маусымында бара беруге болады. Жазда күнге күйіп, жағажайда дем алсаңыз, күз, көктем айларында олардың түрлі мерекелеріне түсіп дәстүрлі коррида ойынын тамашалуыңыз әбден мүмкін. Ал қыста жаңа жылдық мерекелер мен қыстық жеңілдіктерге тап боласыз.

Екінші мәселе – виза мәселесі. Испания елшілігі Астана қаласында. Егер сіздің Испания азаматы болып табылатын танысыңыз болса, ол сізге шақыру жіберіп, виза алу мәселесін жеңілдетеді. Алайда бұндай жағдайда елшілік сіздердің бірге түскен суреттеріңізді немесе хат алысуларыңызды сұратуы мүмкін. Ал шақырусыз болса, қарапайым шенген визасы әзірленеді. Ол үшін ҚР азаматының паспорты, Медициналық страховка (баратын күндеріңізге ғана жасаса болады, мысалы, тек 20 не 10 күн), жұмыс не оқу орнынан ресми бланк қағазында анықтама (ағылшын тілінде, егер мүмкіндік болса, испан тілінде де жасай салған жөн), өз банкіңізден алынатын анықтама және карточкаңызда белгілі мөлшерде ақша бар екендігін анықтайтын анықтама (ол мөлшерді баратын күніңізге қарай есептейді, бір күнде 20-30 еуродай болу керек), сондай-ақ кейде елшілік карточкаңыздың 3 айғы кіріс-шығысын көрсететін анықтама сұратуы мүмкін (выписка по расчету), үйде қалатын туғандарыңның (мысалы, ата-анаңның) паспорттарының көшірмесі, үй кітабының көшірмесі. Болды. Осы құжаттарды дайындасаңыз, виза шамамен алғанда 10 күннің ішінде даяр болады. Айтпақшы шенген визасына 180 еуро, ал шақыруы бар визаға 90 еуродай ақша төленеді. Сондай-ақ құжаттармен бірге, сіз ұшып-келу күнін де белгілеуіңіз керек. Яғни алдын ала интернетте билеттерді броньдап қою керек. Бронь қағазы да виза жасау үшін қажет болады. Саяхат күндерін алдын ала белгілеп алған жөн. Өйткені оны кейіннен өзгертуге болмайды. Виза жайында толығырық ақпаратты Испания елшілігінің сайтынан білуге болады.

Қазірде самолет билеттеріне онлайн тапсырыс берген жеңілдірек болды. Сіз тіпті тек Алматыдан емес, кей елдердің ішкі рейстеріне де еш қиындықсыз тапсырыс бере аласыз. Біздің ұшу маршрутымыз Алматы-Амстердам-Мадрид-Херес болды. Оның алғашқы үшеуі KLM авиакомпаниясымен болса, Мадридтен Хереске дейін испандық Iberia компаниясымен жеттік. Жалпы Еуропаға жаңа жыл қарсаңында ұшу қымбаттырақ. Мысалы, біздің желтоқсанның 27-сі мен қаңтардың 14-не дейінгі алған билетіміз, олардың наурыз айындағы билеттерінен 40-45 мың теңгеге қымбат.

Сонымен билетіміз бен визамыз қалтада, ұшу күніне біраз күн қалды. Жиналу барысына да бірнеше кеңестер. Егер сіз жақындарыңызға сыйлық алмаймын немесе жеңілдіктер мен көркем витриналар мені қызықтырмайды десеңіз, бұл абзацты оқымасаңыз да болады. Әдетте түрлі авиакомпаниялардың жүкке қоятын шектеулері әр түрлі болады. Оны кейде өзіңіз де белгілейсіз. KLM, Iberia компанияларында шектеу - 23 кг болды. Сондықтан мен қайтар кезде қиналмас үшін барарда аз мөлшерде киім алуға тырыстым. Бұл жерде бастысы - ең керектілері мен бір-біріне оңай үйлесімділерін алу шарт. Сондай-ақ ваннада қолданылатын жабдықтардың арнайы «саяхатқа» деген кішкентай мөлшерлерін алып шыққан дұрыс болар. Басты үлкен жүкпен қоса кішігірім қолға ұстайтын бір жүк (оның салмағы әдетте 10 кг аспау керек) және де бір-екі жеңіл пакеттермен қамданып алған жөн.

Жолға киетін киім де жеңіл әрі ыңғайлы болған дұрыс. Әшекей санын да азайтуға тырысыңыз, өйткені әр аэропорттың кедендік тексерісінде белдіктен бастап, етікке дейін шешуіңізге тура келеді. Әсіресе Амстердам аэропортында тексеріс процессі қатал өтеді.

Сонымен Hola! Испанияға қызықты сапарымыз басталды. Сапар барысында тек ұшақ емес, екі аяқпен де, көлікпен де, кемемен де, пойызбен де саяхаттаймыз. Қапы қалмаңыздар.


Жалғасы бар.

Саяхатты бастаған Айжан Кәрібаева

Ad

Rate post

5

Comments

Login to comment