--- title: "ЖАР БАСЫНДАҒЫ ЖАЛҒЫЗ ҮЙ (жалғасы)" description: "Жар басындағы жалғыз үй туралы репортажымыз оқырмандарымызға ой салып, күнәсіз сәбилердің күйіне кү..." author: "abai_kz" published: "2011-04-13T23:02:15+00:00" modified: "2011-04-13T23:04:51+00:00" locale: "kk" canonical_url: "https://yvision.kz/kk/post/zhar-basynda-y-zhal-yz-y-zhal-asy-144069" markdown_url: "https://yvision.kz/kk/post/zhar-basynda-y-zhal-yz-y-zhal-asy-144069/markdown" site_name: "Yvision.kz" --- # ЖАР БАСЫНДАҒЫ ЖАЛҒЫЗ ҮЙ (жалғасы) > Жар басындағы жалғыз үй туралы репортажымыз оқырмандарымызға ой салып, күнәсіз сәбилердің күйіне кү... Жар басындағы жалғыз үй туралы [репортажымыз](http://www.masa.kz/article/view/id/1327) оқырмандарымызға ой салып, күнәсіз сәбилердің күйіне күйінген азаматтар редакциямызға қоңырау шалып, бүгінгі қазақ қоғамының қоқысында қалған жандарға қандайда бір жәрдем етуге дайын екендіктерін шын пейілмен жеткізіп жатыр. Қоғамның дертін түсініп, дауасын бірге іздеуге құлшынған ағайынға алғыс айтамыз. Жалпы, төртінші билік аталғанымен қазақ тілді баспасөзде көтерілген көп мәселенің ізі суып, аяқсыз қалып жататыны рас. Әрі «орыс тілді ақпарат құралдарын ғана билік тыңдайды» деген «қатып қалған» қағидаға берік адамдардың көп екенін арнайы репортажымызға орай жазылған пікірлерге қарап отырып тағы бір рет пайымдадық. Дегенмен, осы жолы олай болмады. Олай болмады деуімізге себеп - «Жар басындағы жалғыз үйдің» жанында тұрып жазылған репортаж қазақ тілді ақпарат құралының қоғамдық пікір қалыптастыра алатынын, ұлттың жоғын жоқтап, халықтың талап-тілегін құзыретті орындарға жеткізе білетінін, ең бастысы - қазақ тілді оқырманның, жай ғана оқырман емес, айналада болып жатқан жайттарға азаматтық көзқарас танытып, сергек қарайтын оқырман болып қалыптасқанын айқын дәлелдеді. Нақтылап айтсақ, арнайы репортаж жарық көрген соң әлеуметтік желілерде қызу талқыға түсіп, мемлекеттік мекемелер мен құзырлы орындарды елең еткізді. Қашан да халық сөзін сөйлеуге барын салатын ҚР Парламенті Мәжілісінің депутаты Мұрат Әбенов мырза кешегі жалпы отырыста Бас прокуратура мен Алматы қаласының әкімінің атына депутаттық сауал жолдады. Алматы қалалық «Жас Отан» ұйымы бізге хабарласып, сәбилерге қажетті киім-кешек жинап, мақалада аталған Тереңқара сайында тазалық шараларын өткізуді қолға алмақ болып жатқандарын хабарлады. Атын атамауды өтінген жекелеген азаматтар сәбилерге қажетті киім-кешек, ойыншықтар мен азық-түліктер сатып алуға ақша бөлуде. Ал кеше түстен кейін Алматы қаласындағы Алатау ауданы әкімінің әлеуметтік істер жөніндегі орынбасары бастаған арнайы комиссия «жар басындағы жалғыз үйдің» жай-күйімен танысып қайтты. Оқырмандарымыздың бұл мәселеге бей-жай қарамай, «Маса.кз»-ға үн қосып, билік орындарының тез қимылдауына әсер еткеніне мың мәрте алғыс айта отырып арнайы комиссиямен бірге барып жасаған репортажды назарларыңызға ұсынамыз. Жар басындағы жалғыз үйді көруге Алатау ауданының әкімшілігінен комиссия барғалы жатқанын білген соң біз де сонда асықтық. Межелеген жерімізге ат басын тірегенімізше болған жоқ аудан әкімінің әлеуметтік істер бойынша орынбасары Маржан Балбаева бастаған арнайы комиссия да келіп жетті. Комиссия құрамында ауданның бас экологы, өзін өзі басқару комитеттетерінің басшылары, оқу, денсаулық, әлеуметтік қорғау бөлімдерінің мамандары, мектеп директорлары мен ішкі істер қызметкерлері бар. ![kom.jpg](http://masa.kz/uploads/elfinder/untitled%20folder3/kom.jpg) Келетіндердің бас-аяғы жиналып болған соң ұзын колонна болып тізіліп жар басындағы үйге бет алдық. ![kom1.jpg](http://masa.kz/uploads/elfinder/untitled%20folder3/kom1.jpg) Бүгін олар мұншама қонақты күтпесе керек. Үй иесі бізден бұрын келген «құдайы қонағымен» далада қызу әңгімелесіп тұр екен. ![kom2.jpg](http://masa.kz/uploads/elfinder/untitled%20folder3/kom2.jpg) Шұбырып көліктен түскен көп адамды көрген қонақ зытып отырды. ![kom3.jpg](http://masa.kz/uploads/elfinder/untitled%20folder3/kom3.jpg) Жар басындағы жалғыз үйдің комиссия келеді деп жиылып-теріліп, жуынып-шайынып отырмағаны белгілі. Айнала да, адамдар да біздің алдыңғы репортажымызда айтылған күйінен аумапты. ![kom4.jpg](http://masa.kz/uploads/elfinder/untitled%20folder3/kom4.jpg) ![kom5.jpg](http://masa.kz/uploads/elfinder/untitled%20folder3/kom5.jpg) ![kom6.jpg](http://masa.kz/uploads/elfinder/untitled%20folder3/kom6.jpg) Үйдің сыртын көріп түңіліп тұрған комиссия ішін де қарап шығуды жөн көрді. ![kom7.jpg](http://masa.kz/uploads/elfinder/untitled%20folder3/kom7.jpg) Жатын бөлмеде бірнеше күндік «гастролден» оралған бикештің бірі ұйықтап жатыпты. Мыналарды өңімде көріп отырмын ба, әлде түсім бе дегендей ол ұйқысын аша алмай отыр. ![kom8.jpg](http://masa.kz/uploads/elfinder/untitled%20folder3/kom8.jpg) Эколог деген аты бар емес пе, үйге алғашқылардың бірі болып кірген маман кейінгі келген әйелдерге үйге кіру тыныс алу жолдарына кері әсер ететінін түсіндіріп жатты. ![kom9.jpg](http://masa.kz/uploads/elfinder/untitled%20folder3/kom9.jpg) Түсі емес, өңі екенін түсінген әлгі әйел ұйқысын ашып комиссияның өзін тергей бастады. ![kom10.jpg](http://masa.kz/uploads/elfinder/untitled%20folder3/kom10.jpg) Абыр-дабыр әңгіме тек сәбилерге әсер етпегендей. ![kom11.jpg](http://masa.kz/uploads/elfinder/untitled%20folder3/kom11.jpg) ![kom12.jpg](http://masa.kz/uploads/elfinder/untitled%20folder3/kom12.jpg) Эколог маманымыз қоқыс үйіндісіне айналып бара жатқан зираттардың тазалығына СЭС жауап береді дегенімен, сай табанында өртеніп жатқан қоқыс пен жанып жатқан ағаштарды көргенде жалма жан қалта телефонын алып, әлдебіреулерге қоңырау шалып тез келіп өртті сөндіруді тапсыра бастады. ![kom13.jpg](http://masa.kz/uploads/elfinder/untitled%20folder3/kom13.jpg) ![kom14.jpg](http://masa.kz/uploads/elfinder/untitled%20folder3/kom14.jpg) ![kom15.jpg](http://masa.kz/uploads/elfinder/untitled%20folder3/kom15.jpg) Тиісті қызметтердің бірін қалдырмай ертіп келген Маржан Балбаеваның репортажда айтылған жайттарға нақты көзі жетті. ![kom16.jpg](http://masa.kz/uploads/elfinder/untitled%20folder3/kom16.jpg) Жаппада тұрып жатқан балалар түгіл, үлкендердің де құжаттары толық болмай шықты. ![kom17.jpg](http://masa.kz/uploads/elfinder/untitled%20folder3/kom17.jpg) Маржан Балбаеваның айтуынша, маскүнем әйелдерді ата-аналық құқынан айыру мәселесі бірден шешіле қоюы екіталай. Себебі, балаларын ата-ананың рұқсатынсыз алып кету заңға қайшы. Егер аналары балаларын асырауға жағдайы жоқ екенін айтып өзі өтініш жазса, тез реттеледі. Ал егер олай болмаған жағдайда мәселені сот қана шешеді. Ол процесс бірнеше айға, тіпті бір жылға созылуы мүмкін. Оған дейін сәбилер маскүнем аналары мен нашақор еркектердің қасында амалсыз тұра береді. ![kom18.jpg](http://masa.kz/uploads/elfinder/untitled%20folder3/kom18.jpg) Сәбилердің жағдайына қатты алаңдап, алғашқы болып үн қатқан қоғамдық ұйым Алматы қалалық «Жас Отан» қанаты. «Жасотандық» мына жігіттер сәбилер тұрып жатқан мекенжайды көздерімен көріп қайтуға келіпті. Олар қазір сәбилерге арнап киім-кешек жинастыруда екен. Сайдағы қоқысты тазалауға да септіктерін тигізуді ойлап отырғандарын жеткізді. Жалпы, соңғы кезде билік партиясының бел баласы «Жас Отан» жастар қанатында рухы биік, мемлекетшіл, ұлтжанды жастардың қатары артып келеді деген сөз рас болса керек. ![kom19.jpg](http://masa.kz/uploads/elfinder/untitled%20folder3/kom19.jpg) Құқық қорғаушылар заңға сәйкес айналаны түгелдей таспаға түсіріп алды. ![kom21.jpg](http://masa.kz/uploads/elfinder/untitled%20folder3/kom21.jpg) Бағанағы маскүнем әйелдің ұйқысы енді ашылған секілді. ![kom22.jpg](http://masa.kz/uploads/elfinder/untitled%20folder3/kom22.jpg) Шаршы орамалын жұлқына тартып жатқанынан-ақ шатақ іздеп тұрғанын түсіндік. ![kom23.jpg](http://masa.kz/uploads/elfinder/untitled%20folder3/kom23.jpg) Үйлеріне мұншама қонақты кім «шақырғанын» енді ұққан секілді. Оның бізге не деп соқтыққанын төмендегі видеодан көресіздер. ![kom24.jpg](http://masa.kz/uploads/elfinder/untitled%20folder3/kom24.jpg) Енді жиналып кетейік деп жатқанда мына жаппаның иесі деп табыла кетті. Өзін Бауыржан деп атаған жігіт бұл үй інісінікі екенін, балаларын аяғандықтан 5 айдан бері мыналарды қуып шыға алмай отырғанын жеткізді. Біз сенгенмен оның сөзіне әкімшілік өкілдері сене қоймады. Олардың ойынша, мына жігіт әкімшілік заңсыз салынған үйді қиратып тастамасын деп баласы бар маскүнемдерді әдейі отырғызып қоюы мүмкін. ![kom25.jpg](http://masa.kz/uploads/elfinder/untitled%20folder3/kom25.jpg) Ортадағы ақсақал Байбесіктің әкімі, яғни өзін өзі басқару комитетінің төрағасы. Ол кісі жаппаға жеткен кезде бұл менің аумағымда емес деп мөңкігенімен, әріптестері бұлтартпайтын дәлел айтып мойнына қойып берді. Онан соң қоршаған ортаның тазалығы сөз болғанда тұрғындар өздері құлықсыз деп шыға келді. ![kom26.jpg](http://masa.kz/uploads/elfinder/untitled%20folder3/kom26.jpg) Шынын айтқанда Байбесік мөлтек ауданының тұрғындары әкімнің кім екенін де білмейді. Танитындары ол кісінің басқа қызметін емес, тек мынау жүк көлігімен қоқыс жинайтындарды басқаратынын ғана біледі. Ал бірақ шаңы бұрқырап жатқан жол бойында азық-түлік сатып тұрғандарға неге тиым салмайтынын түсінбейді. ![kom27.jpg](http://masa.kz/uploads/elfinder/untitled%20folder3/kom27.jpg) ![kom28.jpg](http://masa.kz/uploads/elfinder/untitled%20folder3/kom28.jpg) Сонымен, біздің репортажымызға себепкер болған сәбилердің тағдыры қалай болары әлі белгісіз. Аналарының адуындауына қарағанда өз еріктерімен сәбилеріне бақыт тілей қоймайтындары байқалды. Ендігі сөз билік пен соттың еншісінде қалып тұр. Суреттерді түсірген Еркін Қуатайұлы   [Ардабек СОЛДАТБАЙ](http://masa.kz/article/view/id/1351) ["Маса.кз" ақпараттық портал](http://masa.kz/article/view/id/1351) --- Source: [https://yvision.kz/kk/post/zhar-basynda-y-zhal-yz-y-zhal-asy-144069](https://yvision.kz/kk/post/zhar-basynda-y-zhal-yz-y-zhal-asy-144069)