---
title: "Тоқаев: «Сіздер өмір базарына енді келген, ал біз..."
description: "Бүгін Мемлекет басшысы Қасым-Жомарт Тоқаев Президенттік жастар кадр резервінің форумына қатысты. Онда Президент жастарды мемлекеттік қызметке тартуға қатысты көптеген мәселелерді қозғады. Ол өскелең ұрпаққа зор сенім артатынын жеткізді. Және де..."
author: "seri.jigit"
published: "2024-02-20T09:44:06+00:00"
modified: "2024-02-20T09:45:58+00:00"
locale: "kk"
canonical_url: "https://yvision.kz/kk/post/to-aev-sizder-mir-bazaryna-endi-kelgen-al-biz-aytyp-bara-zhat-an-adamdarmyz-1001367"
markdown_url: "https://yvision.kz/kk/post/to-aev-sizder-mir-bazaryna-endi-kelgen-al-biz-aytyp-bara-zhat-an-adamdarmyz-1001367/markdown"
site_name: "Yvision.kz"
---

# Тоқаев: «Сіздер өмір базарына енді келген, ал біз...

> Бүгін Мемлекет басшысы Қасым-Жомарт Тоқаев Президенттік жастар кадр резервінің форумына қатысты. Онда Президент жастарды мемлекеттік қызметке тартуға қатысты көптеген мәселелерді қозғады. Ол өскелең ұрпаққа зор сенім артатынын жеткізді. Және де...

*Бүгін Мемлекет басшысы Қасым-Жомарт Тоқаев Президенттік жастар кадр резервінің форумына қатысты. Онда Президент жастарды мемлекеттік қызметке тартуға қатысты көптеген мәселелерді қозғады.*

![Тоқаев: «Сіздер өмір базарына енді келген, ал біз...](https://storage.yvision.kz/images/user/577778/c46f35e002c5e182583e23e46d881c.jpg)

Ол өскелең ұрпаққа зор сенім артатынын жеткізді. Және де экономикада, мемлекеттік қызметте немесе басқа секторда жұмыс істеп жүрген жастарға қолдау білдіру үшін қолдан келгеннің бәрін жасайтынын атап өтті.

«**Сіздер өмірдің базарына енді келген, ал біз қайтып бара жатқан адамдармыз. Бұл – қалыпты дүние.** Уақыты келгенде, сіздерге жол береміз. Біз зейнетке шығамыз, орнымызға сіздердей жалынды жастар келеді. Бірақ сіздер туған елге, Отанға қызмет етуге дайын болуларыңыз қажет. Өйткені күрделі заманға тап келіп тұрмыз. Көптеген қиындықтарды бастан өткеріп жатырмыз», – деді Президент.

Мемлекет басшысы Президенттік жастар кадр резервіне өткен мамандарға зор жауапкершілік жүктелетінін атап өтіп, олардың негізгі мақсаты мемлекет мүддесі болуға тиіс екенін айтты.

«Көп ұзамай мемлекеттің игілігі үшін ең жауапты шешім қабылдайтын кезеңге тап келесіздер. Үкіметте болсын немесе квазимемлекеттік секторда болсын, ел басқару ісіне араласасыздар. Әлбетте, жеке секторда да еңбек етесіздер. Сондықтан мен сіздерге зор үмітпен қараймын. Ең алдымен, осы зор жауапкершілікті дұрыс түсінген абзал. Қай салада болмасын, негізгі мақсат мемлекет мүддесі болуға тиіс. Баршаңызға мәлім, мен жақында Үкіметте кеңейтілген жиын өткіздім. Қазақстанның жаңа экономикалық саясатын жүзеге асыруға арналған нақты шараларға тоқталдым. Қазір біздің алдымызда өте ауқымды міндеттер тұр», – деді Қасым-Жомарт Тоқаев.

---

Source: [https://yvision.kz/kk/post/to-aev-sizder-mir-bazaryna-endi-kelgen-al-biz-aytyp-bara-zhat-an-adamdarmyz-1001367](https://yvision.kz/kk/post/to-aev-sizder-mir-bazaryna-endi-kelgen-al-biz-aytyp-bara-zhat-an-adamdarmyz-1001367)