---
title: "Осы айда өтетін ҰБТ-ға өтініш қабылдау аяқталды"
description: "2024 жылдың қаңтар айындаға Ұлттық бірыңғай тестілеуден өтуге 136 мың адам өтініш білдірген. Осы..."
author: "seri.jigit"
published: "2024-01-12T05:14:38+00:00"
modified: "2024-01-12T05:15:42+00:00"
locale: "kk"
canonical_url: "https://yvision.kz/kk/post/osy-ayda-tetin-bt-a-tinish-abyldau-aya-taldy-999794"
markdown_url: "https://yvision.kz/kk/post/osy-ayda-tetin-bt-a-tinish-abyldau-aya-taldy-999794/markdown"
site_name: "Yvision.kz"
---

# Осы айда өтетін ҰБТ-ға өтініш қабылдау аяқталды

> 2024 жылдың қаңтар айындаға Ұлттық бірыңғай тестілеуден өтуге 136 мың адам өтініш білдірген. Осы...

2024 жылдың қаңтар айындаға Ұлттық бірыңғай тестілеуден өтуге 136 мың адам өтініш білдірген. Осы ҰБТ 15 қаңтар мен 10 ақпан аралығында өтеді. Бұл туралы Ғылым және жоғары білім министрлігінің баспасөз қызметі хабарлады.

![Осы айда өтетін ҰБТ-ға өтініш қабылдау аяқталды](https://storage.yvision.kz/images/user/577778/3fc9895792338f74e8b32e4006eaf9.jpg)

Талапкерлер өтініш беру барысында тестілеу күнін, уақытын және орнын өздері таңдаған.

«ҰБТ барысында калькулятор, химиялық элементтердің периодтық жүйесі (Менделеев кестесі) және тұздардың ерігіштік кестесі компьютер экранында көрсетіледі. Тест тапсырушылар тестілеу аяқталғаннан кейін 30 минут ішінде апелляцияға өтініш бере алады. Сертификат апелляциялық комиссияның шешімінен кейін талапкердің жеке кабинетінде қолжетімді болады», - деді Ұлттық тестілеу орталығының директоры Руслан Емелбаев.

ҰБТ-дағы пәндердің саны өзгеріссіз қалады, яғни үшеуі міндетті және екеуі таңдау бойынша. Алайда «Оқу сауаттылығы» мен «Математикалық сауаттылық» міндетті пәндерінен тапсырмалар саны 5 сұраққа қысқарады. Ал бейіндік пәндердің сұрақтар саны артып, 40 тест тапсырмасынан тұратын болады.

Бейіндік пәндерде берілген тізімнен сәйкестікті анықтауға арналған 5 тапсырма қосылады. Осылайша, ҰБТ тапсырмалар саны өзгеріссіз қалады, жалпы 120 сұрақ. Оның ішінде «Қазақстан тарихынан» 20 тапсырма, «Оқу сауаттылығынан» 10 тапсырма, «Математикалық сауаттылықтан» 10 тапсырма және екі бейіндік пән бойынша 40 тапсырма. Жоғары балл – 140, ол да өзгеріссіз қалды.

Тестілеу уақыты – 4 сағат (240 минут). Бұл ретте ерекше білім беру қажеттіліктері бар балалар үшін ұсынылатын қосымша 40 минут уақыт сақталатынын айта кету керек.

---

Source: [https://yvision.kz/kk/post/osy-ayda-tetin-bt-a-tinish-abyldau-aya-taldy-999794](https://yvision.kz/kk/post/osy-ayda-tetin-bt-a-tinish-abyldau-aya-taldy-999794)