---
title: "Мұнай-газ саласы: Қазақстанда 20 мың жаңа жұмыс орны жасалады"
description: "Президент 7 миллиард долларлық инвестициямен полиэтилен зауыты, теңіз кен орындары және газ жобалары туралы айтты."
author: "akorda"
published: "2025-09-05T07:11:54+00:00"
modified: "2025-09-05T07:11:54+00:00"
locale: "kk"
canonical_url: "https://yvision.kz/kk/post/kazakstannyn-munay-gaz-salasyndagy-aukymdy-zhobalar-ekonomikalyk-damu-zhane-zhumys-oryndary-1016938"
markdown_url: "https://yvision.kz/kk/post/kazakstannyn-munay-gaz-salasyndagy-aukymdy-zhobalar-ekonomikalyk-damu-zhane-zhumys-oryndary-1016938/markdown"
site_name: "Yvision.kz"
---

# Мұнай-газ саласы: Қазақстанда 20 мың жаңа жұмыс орны жасалады

> Президент 7 миллиард долларлық инвестициямен полиэтилен зауыты, теңіз кен орындары және газ жобалары туралы айтты.

> – Бұл бағытта нақты жұмыс істеліп жатыр. Атырау, Павлодар, Шымкент қалаларында орналасқан үш ірі мұнай өңдеу зауыты жаңғыртылды. Соның арқасында біз ішкі нарықты сапалы жанар-жағармаймен толық қамтамасыз етіп отырмыз. Жүйелі жұмыстың нәтижесінде 13 миллионға жуық адам табиғи газға қол жеткізді. Қазір бұл бағытта бұрын-соңды болмаған ауқымды жобалар іске асырылуда. Қашағанда жаңа газ өңдеу зауытының құрылысы жүріп жатыр. «Бейнеу – Бозой – Шымкент» газ құбырының екінші желісі салынуда. Сондай-ақ біз қосымша құны жоғары өнімдер шығаруды қолға алдық. Мұнай-газ химиясы саласында бірқатар ірі жобаны іске қосамыз. Мұның бәрі 20 мыңға жуық жұмыс орнын ашуға мүмкіндік береді. Соның ішінде полиэтилен зауытын ерекше атап өткім келеді. Бұл – шетел инвесторларымен бірге іске асырылып жатқан маңызды жоба. Инвестиция көлемі 7 миллиард доллардан асады. «Қаламқас-теңіз» және «Хазар» секілді ірі теңіз кен орындарын игеру басталды. Алты миллиард доллардан астам инвестиция салынады. Теңіз платформаларының құрылысын отандық кеме құрастырушы кәсіпорындар жүргізеді. Бұл Қазақстанның мұнай-газ саласындағы үлкен оқиға болмақ. Аталған жобалардың бәрі энергетикалық әлеуетімізді нығайтып қана қоймай, ел экономикасының қарыштап дамуына ықпал етеді. Мұның игілігін барша халық көреді, – деді Президент.

---

Source: [https://yvision.kz/kk/post/kazakstannyn-munay-gaz-salasyndagy-aukymdy-zhobalar-ekonomikalyk-damu-zhane-zhumys-oryndary-1016938](https://yvision.kz/kk/post/kazakstannyn-munay-gaz-salasyndagy-aukymdy-zhobalar-ekonomikalyk-damu-zhane-zhumys-oryndary-1016938)