--- title: "ЕДБ Қазақстанның мұнай-газ өнеркәсібі және энергетикасына инвестиция салады" description: "Меморандумға сәйкес, ЕДБ «ҚазМұнайГаз» ҰК АҚ компаниялар тобының инвестициялық жобаларын, оның ішінд..." author: "Anuarbek_Ainash" published: "2020-02-15T09:39:52+00:00" modified: "2020-02-15T09:39:52+00:00" locale: "kk" canonical_url: "https://yvision.kz/kk/post/edb-aza-stanny-m-nay-gaz-nerk-sibi-zh-ne-energetikasyna-investiciya-salady-849982" markdown_url: "https://yvision.kz/kk/post/edb-aza-stanny-m-nay-gaz-nerk-sibi-zh-ne-energetikasyna-investiciya-salady-849982/markdown" site_name: "Yvision.kz" --- # ЕДБ Қазақстанның мұнай-газ өнеркәсібі және энергетикасына инвестиция салады > Меморандумға сәйкес, ЕДБ «ҚазМұнайГаз» ҰК АҚ компаниялар тобының инвестициялық жобаларын, оның ішінд... Меморандумға сәйкес, ЕДБ «ҚазМұнайГаз» ҰК АҚ компаниялар тобының инвестициялық жобаларын, оның ішінде «Астрахан-Маңғышлақ» магистральды су құбырын қайта құру және кеңейту жобасы, «Самұрық-Энерго» АҚ, «KEGOC», «ҚазТрансГаз» АҚ инвестициялық жобаларын қаржыландыруға қатысады. «Бейнеу-Шымкент газ құбыры» ЖШС, сондай-ақ «Тау-Кен Самұрық» ҰБХ» АҚ жобаларын да қаржыландырады. Ынтымақтастық аясында тараптар қаржыландырылатын жобаларды халықаралық банктік стандарттарға, әлеуметтік-экономикалық тиімділікке және интеграциялық процестерді дамыту өлшемдеріне сәйкес мұқият іріктеп алуға міндеттенеді. Ахметжан Есімов ЕДБ тәуелсіз Қазақстан тарихындағы ең ірі инфрақұрылымдық жобаға, Нұр-Сұлтан, Қарағанды, Теміртау, Жезқазған қалаларын және Сырдариядағы 171 елді мекеннің 2,7 миллион тұрғындарын қамтитын Сарыарқа газ құбырының құрылысына қатысқанын еске салды. «Банк аймақтағы бірлескен инвестициялық жобаларды жүзеге асыруда белсенді позицияға ие. Жобалардың ішінде «Сарыарқа газ құбырының құрылысы» ерекше идея болып табылады, ол Елбасыға тиесілі идея. Жоба біз үшін өте маңызды, өйткені ол тұрғындар мен кәсіпорындарды сенімді газбен қамтамасыз етіп қана қоймайды, сонымен қатар елдің солтүстік және орталық аймақтарының экологиялық көрсеткіштерін жақсартады. Бұл Банктің Қазақстандағы жаңа бағыттарды дамыту туралы біздің көзқарасымызбен бөлісетіндігін білдіреді», - деді Ахметжан Есімов. Сонымен бірге, Банк аймақтағы инвестициялық жобаларды іске асыруда белсенді позицияға ие. Осы жылдың басында Банктің инвестициялық портфелі 4,322 млрд. АҚШ долларын құрады және оған алты қатысушы елде 98 жоба кіреді. Олардың қатарында «Самұрық-Қазына» АҚ тобымен бірлескен көптеген жобалар бар. Оларға инфрақұрылым, энергетика, мұнай-газ индустриясы және басқа да жобалар жатады. «Бізді тек көлемі ғана емес, сонымен бірге перспективалық бағыттар, атап айтқанда энергетика да қызықтырады. Бізде «Самұрық-Қазына» қорының көмегімен біздің Еуразиялық одаққа кіретін үшінші елдердің нарықтарына шығуды жоспарлап отырмыз, сонда біз онда өнеркәсіп пен энергетиканы дамыта аламыз. Олардың қатарына Тәжікстан мен Қырғызстан сияқты елдер кіреді», - деді Андрей Белянинов. Қазақстан Республикасы Мұнай және газ министрлігінің стратегиялық жоспары - бәсекеге қабілеттіліктің және ұлттық қауіпсіздіктің жоғары деңгейін қамтамасыз ету, көмірсутек шикізаты мен оны қайта өңдеу өнімдеріне экономиканың өсіп келе жатқан қажеттіліктерін қамтамасыз ету мақсатында көмірсутек шикізаты тұрғысынан отын-энергетикалық кешенді дамыту, оларды тиімді пайдалануға бағытталған ғылыми-технологиялық әлеуетті дамыту болып табылады. ![](https://storage.yvision.kz/images/user/315956/eaf24846a54a755c4d006d6f6acef6.jpg) Мұнай саласының дамуы Қазақстанның бүкіл экономикасы үшін өте маңызды. Мұнай-газ кешені елдің және оның жекелеген аймақтарының әлеуметтік-экономикалық дамуына шешуші әсер етеді, іс жүзінде мемлекеттің бүкіл экономикасы үшін локомотив болып табылады, экономиканың басқа салаларының дамуына ықпал етеді. Өңірлер мен бүкіл мемлекет бойынша маңызды әлеуметтік бағдарламалардың іске асырылуы мұнай-газ кешені кәсіпорындарының жұмысымен байланысты. Мұнай-газ саласындағы қайта құру саланың өзі де, солармен байланысты өндірістердің де жұмысының тиімділігін арттыруға бағытталған, бұл елдің энергетикалық қауіпсіздігін нығайтуға, сондай-ақ кәсіпорындардың бәсекеге қабілеттілігін, қызмет көрсету мен өнімнің сапасын арттырумен бірге экономиканың тұрақты өсуі мен әртараптандырылуын қамтамасыз етуге көмектеседі. ![](https://storage.yvision.kz/images/user/315956/f5428115c92185e71652f5c4d304ac.jpg) Осы ретте экономиканың осындай елеулі орын алатын саласын дамытуда тек Еуразиялық даму банкі ғана емес, Қазақстан даму банкі де өз үлесін қосуда. Мәселен, Қазақстан Даму Банкі 2019 жылы Қазақстанның экономикасына 500 миллиард теңге инвестиция салды. Банк Басқарма төрағасының айтуынша, 2019 жылы тікелей несиелеу аясында банк жалпы сомасы 436,5 млрд теңгеге 11 инвестициялық жобаны және 3 шикізаттық емес кәсіпорындардың экспорттық операцияларын мақұлдады. Бұл жобалардың қатарында Қапшағай қаласында қуаттылығы 100 МВт күн электр стансасының құрылысы, «Сарыарқа» газ құбырының құрылысы, Шымкент қаласында метил-терт-бутил эфирін шығаратын зауыттың құрылысы, Ақтоғай ГӨК қуаттылықтарын кеңейту және ауыл тұрғындарын кең жолақты қол жетімді байланыспен қамтамасыз ету сияқты ірі жобалар бар. Қазақстан Республикасының талшықты-оптикалық байланыс желілері, Ақмола облысында бройлер құс фабрикасы құрылысының екінші кезеңі және басқа да жобалар қамтылған. 2019 жыл Қазақстан үшін мультипликативті әсер ететін маңызды жобалардың іске қосылуымен ерекшелененді. Олардың қатарына Қарағандыдағы жоғары технологиялық ферросилиций зауытын, «YDD Corporation» ЖШС, Шымкенттегі трансформатор зауытын, «Сарыарқа» газ құбырын, Шымкент мұнай өңдеу зауытын жаңарту және қайта құрылуын, Атырау мұнай өңдеу зауытында тереңдетілген мұнай өңдеу кешенінің құрылысы аяқталуын жатқызуға болады. Сонымен қатар, Қазақстан даму банкі жаңартылатын энергия көздері саласындағы өз құзыретін белсенді түрде кеңейтуде - 2019 жылы ҚДБ қатысуымен 3 жасыл жоба іске қосылды. Ол жобалар: өткен жылы Қапшағайдағы Нұрғиса күн электр станциясы, Түркістан облысындағы «Жылға» күн электр станциясы және Ақмола облысындағы «Астана ЭКСПО-2017» жел электрстанциясы жұмыс істей бастады. Сонымен қатар, ҚДБ 2020 және 2021 жылдары тиісінше шамамен 430 млрд. теңге және 458 млрд. теңгенің жобаларын әзірлеуді жоспарлап отыр. Банк төрағасының айтуынша, банктің стратегиялық даму жоспарларында жасыл жобаларды, құнарлы энергия көздерін және өңдеуші өнеркәсіп пен инфрақұрылымдағы экологиялық таза жобаларды қаржыландыру құзыреттілігін дамыту, бірлескен жұмыс жобалар бойынша екінші деңгейлі банктермен жұмыс, сонымен қатар халықаралық инвесторлармен ынтымақтастық құру қарастырылған. --- Source: [https://yvision.kz/kk/post/edb-aza-stanny-m-nay-gaz-nerk-sibi-zh-ne-energetikasyna-investiciya-salady-849982](https://yvision.kz/kk/post/edb-aza-stanny-m-nay-gaz-nerk-sibi-zh-ne-energetikasyna-investiciya-salady-849982)