---
title: "Білім мекемелеріндегі педагог емес қызметкерлердің де жалақысы әжептәуір өсетін болды"
description: "2025 жылы білім беру ұйымдарының педагог емес қызметкерлерінің жалақысы 100 пайызға артады. Бұл..."
author: "orazali"
published: "2024-01-16T11:43:19+00:00"
modified: "2024-01-16T11:43:50+00:00"
locale: "kk"
canonical_url: "https://yvision.kz/kk/post/bilim-mekemelerindegi-pedagog-emes-yzmetkerlerdi-de-zhala-ysy-zhept-uir-setin-boldy-999952"
markdown_url: "https://yvision.kz/kk/post/bilim-mekemelerindegi-pedagog-emes-yzmetkerlerdi-de-zhala-ysy-zhept-uir-setin-boldy-999952/markdown"
site_name: "Yvision.kz"
---

# Білім мекемелеріндегі педагог емес қызметкерлердің де жалақысы әжептәуір өсетін болды

> 2025 жылы білім беру ұйымдарының педагог емес қызметкерлерінің жалақысы 100 пайызға артады. Бұл...

2025 жылы білім беру ұйымдарының педагог емес қызметкерлерінің жалақысы 100 пайызға артады. Бұл жайында Оқу-ағарту министрлігіндегілер хабарлады.

![Білім мекемелеріндегі педагог емес қызметкерлердің де жалақысы әжептәуір өсетін болды](https://storage.yvision.kz/images/user/577776/e7e6a2d74da6c087a5edcb5eacc766.jpg)

«Мемлекет басшысы мен ел Үкіметі бюджет саласы қызметкерлерінің еңбегіне ақы төлеу мәселесіне үнемі ерекше назар аударады. Бюджет саласының қызметкерлерінің, оның ішінде педагогтердің жалақысы бірнеше рет (2001 жылы — 30, 2002 жылы — 35, 2004 жылы — 20, 2006 жылы — 32, 2007 жылы — 30, 2008 жылы — 8, 2009 жылы — 25, 2010 жылы — 25, 2011 жылы — 30, 2014 жылғы 1 сәуірден бастап — 10, 2016 жылы шамамен — 11, 2019 жылы шамамен 50 пайызға) көтерілді. Мемлекет басшысының 2019 жылғы 2 қыркүйектегі Қазақстан халқына Жолдауындағы тапсырмаға сәйкес, 2020-2023 жылдары кезеңінде педагогтердің жалақысы екі есеге (2020 жылы — 25 (2019 жылғы базаға қарағанда), 2021 жылы — 50, 2022 жылы — 75 және 2023 жылы — 100 пайызға) артты. Сондай-ақ мектепке дейінгі тәрбие және оқыту педагогтерінің жалақысы 2023 жылғы 1 қыркүйектен бастап тағы 30 пайызға көтерілді. Биыл педагогтердің жалақысын арттыру қарастырылмаған», — деп атап өткен министрліктегілер агенттіктің ресми сауалына орай.

Ведомствоның мәліметінше, Мемлекет басшысының 2021 жылғы 1 қыркүйектегі Қазақстан халқына Жолдауындағы тапсырмасын орындау үшін білім беру ұйымдарында қызмет атқаратын педагог емес қызметкерлердің (әкімшілік және қосалқы персонал қызметкерлерінің) жалақысы 2022-2025 жылдар кезеңінде орта есеппен 20 пайызға көтеріліп жатыр.

Мәселен, олардың жалақысы 2022 жылы — 23, ал өткен жылы — 45 пайызға ұлғайды.

«Осылайша, білім беру ұйымдарының әкімшілік және қосалқы персонал қызметкерлерінің жалақысы 2024 жылы 71 пайызға өсті. Аталған санаттағы қызметкерлердің жалақысын 2025 жылы 100 пайызға арттыру жоспарланған», — деді министрлік өкілдері.

kaz.inform.kz

---

Source: [https://yvision.kz/kk/post/bilim-mekemelerindegi-pedagog-emes-yzmetkerlerdi-de-zhala-ysy-zhept-uir-setin-boldy-999952](https://yvision.kz/kk/post/bilim-mekemelerindegi-pedagog-emes-yzmetkerlerdi-de-zhala-ysy-zhept-uir-setin-boldy-999952)