«Хабар» телеарнасы 10 сәуірден бастап ауқымды «Жұлдыздар айтысады» шоуының көрсетілімін бастады. ТВ-шоуда танымал өнер жұлдыздары мен айтыскер ақындар жұптасып тапқырлығы және шешендігі бойынша сайысқа түседі. Орамды ойларын ортаға салу үшін сахнаға 16 қатысушы шықты және олардың арасында жеребе тастау арқылы 8 жұп айқындалады. Суырып салма өнерінде өзін жақсы танытқан жұп шоу жеңімпазы атанады. Сайыстың басты жүлдесі – 1 миллион теңге.
Жобаға қатысушылар арасында: Еркін Нұржанов, Ернар Айдар, Асхат Тарғын, Қайнар Алагөзов, Жанболат Найзабеков, Мөлдір Әуелбекова, Бибігүл Тілеболдинова, Сара Тоқтамысова, Жазира Байырбекова, Дидар Қамиев, Шахаризат Сейдахметов, Шалқарбай Ізбасаров, Рүстем Қайыртайұлы, Роза Әлқожа, Амангелді Сейітханов, Сырым Әуезхан.
Жүргізушілер – әнші Жанар Айжанова мен пародист Бақытжан Қасым.
«Жұлдыздар айтысады» шоуы әр жексенбі сайын сағат 19.45 көрсетілетін болады. Бағдарламалар шығарылымдарын сондай-ақ www.khabar.kz сайтынан да тамашалауға болады.
Біздің хэштег: #шоуайтыс