Мемлекеттік қызмет саласына енгізілген Заңға қатысты өз пікірімен бөліскен Бүкіләлемдік Банк өкілі Қазақстандағы мемлекеттік басқару, әкімшілік реформалар жөнінде өз ойымен бөлісіп, оның алғашқы даму кезеңдеріне тоқталды:
- Мен қазіргі уақытта Қазақстандағы мемлекеттік қызмет реформасымен тікелей айналыспаймын, алайда оның даму баспалдақтарын өз көзіммен көріп, үлес қостым. Мемлекеттік басқару мен мемлекеттік қызметте 1996-1997 жылдары жүргізілген реформалар бұл саланың іргетасы қалануына, оның кейінгі дамуына үлкен серпін берді. Бірінші тенденция бойынша, аймақтық басқару мен жергі-лікті басқарудың негізі қалан-ған. Бұл - елдің астанасын ауыстыру жүргізіліп жатқан кезең болатын. Екінші тенденция бойынша, мемлекеттік органдар, министрліктер, комитеттер жүйесіне елеулі өзгерістер енгізілді. Мемлекеттік қызмет агенттігі осы жылдардан бастап басқару жүйелері мен тетіктерінің дамуына, жаңа кезеңге өтуіне тікелей әсер етті. Қазақстан мемлекеттік қызметті кәсібилендіруді қолға алған алғашқы мемлекеттер қатарынан табылды. Сол кезеңдерде мемлекеттік қызметке конкурстық негізде қызметке алудың алғышарттары жасалды, мемлекеттік қызметкерлердің еңбегін бағалау, олар атқарған қызметтің нәтижесіне байланысты қызметтік сатыда өсуі, Ар-намыс кодексінде көзделген қағидалар бойынша қызметкерлердің қызметтік этикасын қалыптастыру жолға қойыла бастады. Бұл саладағы инновация қызметкерлердің еңбекақысы жүйесіне де қатысты болды, олардың ішкі дициплина, ішкі мәдениет, кәсіби қызметтерінің құқықтық негіздері жетілдірілді. Адам ресурсын модернизациялау барысында агенттік маңызды рөл атқарды. Бүгінгі Қазақстандағы мемлекеттік қызметтің жоғарғы дәрежеге жетуі, әлемдік стандарттарға сәйкес келуі соноу 90-жылдары басталған реформалардың оң нәтижесі болып табылады, - деді ол.
Сонымен қатар Амит Мукерджи Мемлекеттік қызметкерлердің таңдаулы «А корпусының» құрылуы мен қалыптасуына қатысты ойымен бөлісе келе, бұл фактордың әлемнің өзге де дамыған мемлекеттерінде бар екендігін, жоғары жалақы төленетін және бағаланатын мұндай таңдаулы қызметкерлер корпусына қабылдану конкурстық негізде, жоғары талаптар бойынша іске асатындығын айтты.
Ерлан ТӨСБАЙҰЛЫ