Күз – береке, молшылық. Ерте көктемнен жаз соңына дейін белін жазбаған диқан қауымының еңбегінің рахатын шын сезінетін кезеңі бұл. Осындай береке уақытында Оңтүстік топырағына туын тіккен бірнеше аудан, қалалар да мерейтойын тойлауға уақыт тапты. Соның бірі – Шардара ауданы. Мұнда осындағы су қоймасының құрылысына 50 жыл және аудан, қаланың құрылғанына 40 жыл толуына орай мерейтой өткізіліп жатқанда, араға күн салып алаш жұрты үшін қасиетті құт мекен Қазығұрт ауданы да өзінің 80 жылдығын лайықты атап өтті.
Оңтүстік үшін ғана емес, Қазақстанда да орны бөлек екі ауданның торқалы тойына облыс әкімі Нұрғали Әшімовпен бірге “Егемен Қазақстан” республикалық газеті” АҚ президенті Сауытбек Абдрахманов қатысып, аудан халқын құттықтады.
Бүгінде алып жасанды теңіз үстінде шағаласы шарқ ұрып, толқыны жағалауды сүйіп жатқан Шардара мен сұлу қыздың жел тербеген бұрымындай көзге ұрып, момақан кейіппен Арал теңізіне бет алған Сырдың бойы осыдан қырық-елу жыл бұрын құлазыған қу дала болды деген қазір ертегі сияқты. Алғашқы комсомол-жастар бригадалары толқын-толқын болып келіп қазығын қаққан сар далада бүгін Қазақстанда теңдесі жоқ көлі бар аудан түтінін түтетіп отыр.
Шардара!
Шалқадан жатыр адамдар салған арнада.
Қанды ма шөлің, нар далам?
Тынды ма үнің зарлаған
Шардара! – деп ақиық ақын Мұқағали Мақатаев жырлаған Шардара ауданының мерейтойы алдымен республикалық ақындар мүшәйрасымен ашылды. Қазақтың тағы бір қадірлі ақыны Қадыр Мырза Әлі төрағалық еткен жыр жарысына елу шақты ақын қатысып, нулы өлкені өлең нәрімен сусындатты.
Келесі күні Шежіре саябағында облыс әкімі Нұрғали Әшімов, облыстық мәслихаттың хатшысы Әбілқасым Досболов бастаған азаматтар Төле, Қазыбек және Әйтеке би ескерткіштеріне гүл шоқтарын қойды. Шардарада еңбек еткен аудан әкімдерінің бірі Серік Ибадуллаев қалада жал-жал болып үйіліп жататын үйінділерді күретіп, су жүргізіп, көшет егіп төңіректі жазираға айналдырған еді. Ауданның тізгінін ұстаған, орда бұзар отызды орталаған Марғұлан Марайым да әріптесінің жақсы бастамасын сәтті жалғастырған. Соңы көк теңізге барып тірелетін “Тұңғыш Президент” саябағы Шардараның көркін ашқан көкорай белге айналған. Саябақта “Ғашықтар аллеясы” салынып, монументі орнатылған, “Ақ босаға” неке сарайы бас қосқан жастардың құтты орны. Осында “Ана мен бала” ескерткіші да өз көркімен көз тарта асқақтап тұр. Шардараның бар тарихын бойына жинаған аудандық тарихи-өлкетану мұражайы да саябақ ішінде.
Облыс басшысы Н.Әшімов пен облыстық мәслихаттың хатшысы Ә.Досболов, сенатор Қ.Айтаханов пен “Егемен Қазақстан” республикалық газеті” АҚ президенті С.Абдрахманов “Батырлар аллеясына” гүл шоқтарын қойғаннан кейін мерекеге арналған салтанатты жиын Абай атындағы Мәдениет үйінде жалғасты.
Аудан әкімі Марғұлан Марайым баяндама жасап тұр. Иә, бертінге дейін күйі келмей жүрген аудандардың бірі Шардара еді. Қазіргі жағдайы көңіл тоғайтарлық.
Бүгінде Вице-премьер қызметіндегі Өмірзақ Шөкеев осы облыста басшы болып тұрғанда әр ауданға тиесілі бюджеттен бөлек 200 млн. теңгеден қаржы бөлген еді. Бірді екі ете алмайтын әкімдердің алдының еккен көшеттері қурап қалғанда, іскерлері осы ақшаға жыртығын бүтіндеп алды. Соның бірі – осы Марайым. Жиын барысында облыс басшыларының бірі: “Марғұлан қаланы абаттандыру жұмысына аудан халқын тегіс ұйыстырып, 200 миллионның орнына 600 миллионның жұмысын істеп алды”, деп орынды айтты. Қаладағы көп қабатты үйлердегі қордаланған мәселелер шешімін таба бастады. Соңғы жиырма жылда жөндеу көрмеген шайынды су ағатын жүйелер қалыпқа келтірілді. Насостар орнатылды. Арық-атыздар тазартылып, көшеттер егілді. Қаланың санитарлық тазалау жұмыстары жөнге қойылды. Көшелер жөнделді, асфальт төселіп, жарықтар тартылды.
Аудан басшысы Шардараны аяғынан нық тұрғызу үшін өңірдің қолынан келетін бес стратегиялық бағыт таңдаған. Атап айтқанда, туризм саласын дамыту. Ет, сүт, балық өнімдерін өңдеудің соны тәсілдерін іске қосу мен мақтаны шикізат күйінде емес, ауданның өзінде өңдеу бағыттарын іске асыра бастаған. Шардара көлі Оңтүстікте жалғыз. Жағалауына инвестиция салып, көпшілік демалатын жайлар салуға ынталы азаматтар баршылық.
Қойнауы төрт түлікке толы Қызылқұм да саф ауа аңсаған саяхатшылар үшін тамашалауға қолайлы аймақ. “Агронесие” корпорациясы” АҚ арқылы 151 млн. теңге несие алған жеке кәсіпкер Б.Серманиязов балық өнімдерін өңдейтін зауытын жыл аяғына дейін қоспақ. “Алтын-текс” шағын тоқыма фабрикасы мен мақта майын сығатын, мал азығын дайындайтын кәсіпорын құрылысы басталған.
Жиында отыз жасында Шардара аудандық атқару комитетінің төрағасы болып, өнегелі ізін қалдырған, бүгінде сенатор Қуаныш Айтаханов сөз алып, Қызылқұм массивін игерудің екінші-үшінші сатылары жайында әңгімеледі. Көксарай су реттегіші туралы бүгінде кейбіреулер әртүрлі әңгіме айтып жүр. Сенатор оның дәйексіздігін бір ауыз сөзімен жоққа шығарды. Бүгінге дейін Қазақстанға тиесілі 40 млн. текше метрге жуық су Өзбекстанға өтіпті. Көршілер одан үлкен көл жасап, қызығын көріп отыр.
Көксарай арқылы Аралға су толық барады, ен жағалауына ел қонады. Үлкен келешек бар.
Облыс әкімі Нұрғали Әшімов тағайындалғанына көп уақыт бола қоймаса да толайым табыстарға жеткен аудан әкімі М.Марайымның жұмысына көңіл толатындығын білдіріп, атқарар ісіне әрі қарай да табыс тіледі.